La febre de la puhada* en D1 es passada despì un béu moument e aven un poù lou sentimen que lou Gym noun creisse: fen pus de proumiera partida de campiounat de l’autre mounde, si sauven toujour à una o doui journada de la fin…
Li es pus gaire que la coupa de la liga (liga que pouden pas sudurà eme l’autra bambana de Thiriez e li siéu baffi) per nen faire un poù vibrà.
E s’ajougnen à tout acò la dissolucioun de la BSN…
Es ver li es un poù de noù:
-lou president ven de chanjà, bessai que pourrà dounà un poù d’abriva au club. Ma mi maufidi toujour, perque siéu pas tan vielh ma de president n’ai counouissut. Toui lu Sensi, Pastorello que s’en batìon doù gym e que venguèron per s’enricà un pau mai sus la keute d’azur. Au mancou, Rivere es mai o proun d’aquì. Veiren ben…
-lou GSN. Per una cagada, lou gran estadi n’es una. Capissi toujour pas lou ligam tra l’estadi e lu jugaire. Mi poudès dounà lu soulié de Messi e mi laissà emb’un baloun touta la nuèch en lou Camp Nou, Old Trafford o sabi pas doun que juguerai pas pus ben qu’à l’oli. Quoura lou Ray serà destruch e que lou GSN serà vuèi auren pus que lu uès per si plourà (Ray e basta!).
Que soulucioun aloura per dounà l’envuèia ai gent de venì à l’estadi?
OGCN, mai qu’un club?
Aven un club poupulari que pourrìa estre diferent.
Despì toujou, lou gym es estat supportat dai Nissart. Aquelu que vivon à Nissa ma soubretout aquelu que parlon Nissart, que si senton Nissart, que soun estat alevat en bouoi Nissart.
Un poù couma lou Torino qu’es lou club dei Torinesi aloura que la juve es lou club dei gen doù sud, l’OGCN a pas voucacion à estre un club regiounal: es lou club de la vila e de la Countea.
Tout acò rapresenta tout de meme un cavagnoù de mai de 800 000 persouna (Nissa, couòla, mountagna, riba de mar coustà Vilafranca fin au Cau d’ae…). N’i a proun per emplì un estadi e croumpà de malha.
E se lou gym siguesse propi lou club de Nissa e pas un club de mai en la ligue 1 – pourtegal* à la limita de la franchisa americana?
Perque noun faire lou pati d’un club emb’un’identità fouòrta ?
Perque degun utilisa propi aquela fibra Nissarda, tan au nivéu dei supporter que de la fourmacioun dei jugaire?
Li miéu inspiracioun soun segur lou Barça, lou club que fa la promocioun de la Catalougna, que juèga la champion’s league eme de jugaire catalan e d’estranger que parlon catalan. O encà, l’Athletic Bilbao, foundat dai Ingles e que n’engagia que de jugaire bascou.
http://www.sofoot.com/bilbao-retour-vers-le-futur-144606-article.html
E perque noun regarjà devers lou nemic de toujour, lou SC Bastia, que lou siéu entrenur (qu’es minga corsou) a decidat de metre de cours de corsou au centrou d’entrahinamen (soubretout que lu jugaire pro an lou tems).
Bessai que tout acò pourrà foundà un ver couletiéu e un ligam pu fouòrt tra lou club e lu supportaire.
Seguran
*puhada=mountada
*pourtegal significa « orange » en Nissart